þriðjudagur, 28. febrúar 2017

Fýll sem var merktur 17. október 1970 endurheimtur!

01. mars 2011 kl.15:22

Merktur fýll kom í fiskinet við Eyjólfsklöpp suðvestur af Heimaey 18. febrúar síðast liðinn og leit merkið út fyrir að vera nokkuð gamalt. Haft var samband við Óskar Sigurðsson í Stórhöfða en hann hefur merkt ófáa fýla í gegnum tíðina.

Fýll á flugi við Ofanleitishamar á Heimaey.

Í ljós kom að Óskar hafði merkt þennan fýl fullorðinn í Stórhöfða 17. október 1970. Því var fýllinn að minnsta kosti 41. árs! Aldrei hefur liðið eins langur tími frá merkingu að endurheimt á þeim fuglum sem Óskar hefur merkt, fyrra met var 36 ár. Frá Náttúrufræðistofnun Íslands fengust þær upplýsingar að elsti merkti fýllinn hafi náðst lifandi 43 ára og 11 mánaða gamall í Bretlandi svo þetta er ekki met. Merkinu verður nú komið til Náttúrufræðistofnunar Íslands en þar er haldið utan um fuglamerkingar á Íslandi.

föstudagur, 24. febrúar 2017

mánudagur, 6. febrúar 2017

http://timarit.is/view_page_init.jsp?pageId=6173253

http://www.mbl.is/greinasafn/grein/113739/

15. október 1993 | Innlendar fréttir | 411 orð

Óskar á Stórhöfða hefur merkt 61 þúsund fugla Vestmannaeyjum.

Óskar á Stórhöfða hefur merkt 61 þúsund fugla Vestmannaeyjum. Alþjóðafugladagurinn var um síðustu helgi og var af því tilefni boðið upp á ókeypis aðgang að Náttúrugripasafninu í Eyjum. Tveir áhugamenn um fuglamerkingar, Óskar Sigurðsson vitavörður á Stórhöfða og Sigurgeir Sigurðsson, voru á safninu og svöruðu fyrirspurnum gesta um starf sitt við merkingar og röktu hvar fuglar sem þeir hafa merkt hafa fundist. Þeir Óskar og Sigurgeir eru afkastamiklir merkingamenn, því Óskar hefur merkt 61.000 fugla og Sigurgeir 15.500 fugla.
Á Náttúrugripasafninu var sett upp kort sem sýndi ferðaleiðir fugla sem merktir hafa verið í Eyjum. Mest hefur verið merkt af lunda og lundapysjum í Eyjum og virðist sem pysjan fari héðan til Nýfundnalands og haldi sig þar í tvö ár áður en hún kemur til Eyja á ný. Einnig hafa verið merktar skrofur og fýlar auk ýmissa mófugla. Skrofa sem Sigurgeir merkti fannst til dæmis á Nýfundnalandi og önnur sem Jóhann Óli Hilmarsson merkti í Ystakletti árið 1991 kom fram í janúar í ár syðst í Brasilíu, í 10.840 kílómetra fjarlægð frá Eyjum.
Kristján Egilsson safnvörður Náttúrugripasafnsins sagði í samtali við Morgunblaðið að Óskar Sigurðsson væri líklega afkastamesti merkingamaður lunda í heiminum. Hann hefði merkt 43.000 lunda og pysjur, og 17.000 fýla og 1.000 fugla af öðrum tegundum. Óskar hefur bæði merkt lunda sem hann veiðir í háf, unga sem hann hefur merkt í hreiðri og svo lundapysjur sem fundist hafa í bænum. Í haust setti Óskar met í merkingu lundapysja, en þá merkti hann 1.336 pysjur og fann sonur hans, Pálmi, þær flestar í bænum.
Aldraðir lundar
Af merkingum Óskars má sjá að lundinn getur náð talsvert háum aldri. Lundi sem hann merkti sem unga í holu 28. ágúst 1960 fann Óskar í holu 4. júlí á síðasta ári, 31 ári eftir að hann merkti lundann.
Sigurgeir Sigurðsson hefur mest merkt af pysju sem fundist hefur í bænum og í haust merkti hann 410 pysjur og voru það þrír krakkar sem söfnuðu pysjunum sem Sigurgeir merkti. Sigurgeir hefur í allt merkt 14.000 lundapysjur, mest pysjur sem fundist hafa í bænum, og 1.500 mófugla, mest tjald, stelk og sandlóu. Þeir mófuglar sem hann hefur merkt hafa margir fundist á Bretlandi og í Frakklandi.
Kristján sagði að merktir fuglar frá tíu löndum hefðu fundist í Eyjum til þessa og flestir væru þeir frá löndum í Evrópu.
Grímur
Morgunblaðið/Sigurgeir Jónasson
Merkismenn
ÓSKAR Sigurðsson fuglamerkingamaður og Pálmi sonur hans, en Óskar fræddi gesti Náttúrugripasafnsins um fuglamerkingar og ferðalög fugla um heiminn.

miðvikudagur, 1. febrúar 2017

2.2.2011

Úr 2 í 22 m/s á einni klukkustund

Veðurspárnar í dag hafa gert ráð fyrir því að það myndi hvessa á landinu af SV um leið og lægðin sem hefur verið við Suðurland í dag berst norðaustur yfir . Þá dregur hún afturbeygðu skil lægðarinnar eða snúð hennar inn á suðvestan- og vestanvert landið. Strengurinn er þegar þetta er skrifa laust fyrir kl. 20 skammt fyrir sunnan land og nær þegar til Vestmannaeyja. Til marks um það hvað veðrið brestur snögglega á að þá voru SV 2 m/s kl. 17 á Stórhöfða en kl. 18 mældust V 22 m/s. Klukkustund síðar var veðurhæðin 26 m/s.
Það er vel þekkt hversu veður getur skyndilega versnað suðvestanlands þegar afturbeygð skil sunnan við lægðarmiðju færast inn á land um leið og miðjan fer til norðurs eða norðausturs. Meðfylgjandi tunglmynd (frá Dundee) frá því kl. 14:30 sýnir stöðuna sæmilega. Reyndar er skýjasnúðurinn ekki mjög greinilegur, en hann er þarna engu að síður. Það er talsverður "óróleiki" þarna fyrir sunnan og talsverð átök þar sem kalt loft úr vestri þrengir sér undir hlýrra loft sem komið er allan hringinn umhverfis lægðarmiðjuna.ÞAr er marg fleira áhugavert á þessari mynd sem gamanværi að fjalla um, en læt það vera að sinni.
Lægðin er hins vegar farin að grynnast lítið eitt og þá sljákkar um leið í mesta vindinum. Engu að síður er spáð um 25-30 m/s í um 1.000 metra hæð og skv. gamalli reynslu skilar sá vindur sér niður í éljunum. Kannski ekki alveg sem meðalvindur í 10 mínútur, en í nokkurn tíma engu að síður.
Hitt getur líka gerst þó það séu minni líkur en hitt að lægðarmiðjan taki að reka meira til austurs en norðurs, en þá nær vindröstin varla landi annarsstaðar en allra syðst og í Vestmannaeyjum. Sú framvinda er ekki spáin, en ég nefni þetta hér því maður hefur séð slíkt gerast fyrr þegar djúpar og mjög víðáttumiklar lægðir eiga í hlut.

http://esv.blog.is/blog/esv/entry/1139113/

Fimmtudagur 02. feb 2012 kl. 15:16

Yfirleitt logn á Stórhöfða að undanförnu

Þeir sem leggja við hlustir þegar útvarpað er frá Veðurstofu Íslands kl. 10.10 á morgnana, hafa tekið eftir því að nú að undanförnu hefur yfirleitt verið logn á Stórhöfða. - Ekki þar fyrir að oft er jú logn á Stórhöfða , - en þegar rokhvasst er í Vestmannaeyjabæ, en logn á Stórhöfða, - er eitthvað skrítið að gerast. Óskar Sigurðsson í Stórhöfðavitanum, þar sem veðrið er tekið, sagði að á þessu væri einföld skýring: Sjálfvirki vindmælirinn er bilaður og hefur verið lengi, hann sendi því þau skilaboð til Veðurstofunnar að logn sé á Stórhöfða.

Sú veðurlýsing sé því oft lesin í útvarpinu, hver svo sem ástæðan fyrir því er. Veðurstofan veit af þessari bilun en hefur enn engan fræðing sent á Stórhöfða til laga mælinn. Óskar segir að þessir nútímamælar endist stutt núorðið. En á þriggja tíma fresti sendi hann eða sonur hans, sem er tekinn við hlutverki veðurathugunarmanns í Stórhöfða, skeyti til Veðurstofunnar um veðrið, en þá verði þeir að áætla vindstyrkinn vegna bilunarinnar en vindstefnumælirinn sé hinsvegar í lagi. En þau skeyti séu ekki alltaf notuð í veðurlýsingunni kl. 10.10, - því hafi oft verið logn á Stórhöfða að undanförnu.

http://www.eyjafrettir.is/frettir/yfirleitt_logn_a_storhofda_ad_undanfornu/2012-02-02